काठमाडौं- गृहमन्त्री रमेश लेखकले लोकतन्त्रका आधारभुत तत्व मध्ये विधिको शासन एउटा तत्व भएको बताएका छन् ।

बिहीबार सिंहदरबारमा विकास, आर्थिक मामिला तथा सुशासन समितिले ‘सुशासन प्रवर्द्धनका लागि राष्ट्रिय सदाचार नीतिको आवश्यकता’ विषयक छलफलमा बोल्दै गृहमन्त्री लेखकले यस्तो बताएका हुन् ।

उनले विभिन्न प्रकरणमा फाइल खोल्ने विषयमा सांसदहरूले राखेको जिज्ञासापछि बोल्दै लेखकले लोकतन्त्रमा कानुनबिना कसैलाई पनि मुद्दा चल्न नसक्ने बताए ।

‘फाइल खोल्ने भनेको के हो ? मुद्दा चलाउने भनेको होला नि, लोकतन्त्रमा मुद्दा कानुनबेगर चल्छ?, रहरमा कसैलाई पनि मुद्दामा चल्दैन, कसैका चाहनाले मुद्दा चल्दैन, कानुन बमोजिम चल्छ भन्ने मेरो आग्रह छ’, उनले भने, ‘कुनै मुद्दा चलेको छ भने छुट्ने कुरा पनि कानुन बमोजिम छुट्छ भन्ने मेरो आधारभूत मान्यता हो ।’

मानिसले आफ्नो भित्रबाट राम्रो गर्न उत्प्रेरित गर्ने विषय सदाचार भएको लेखकले बताएका छन् ।

‘यो विषयलाई सरकारले प्राथमिकतामा राखेर काम गर्ने प्रद्धिबद्धता व्यक्त गर्दछु,’ उनले भने, ‘संसदीय समितिबाट सरकारलाई आवश्यक सुझाव दिन आग्रह गर्दछु ।’