काठमाडौं – उपेन्द्र सुब्बाको लेखन र निर्देशन रहेको फिल्म ‘मनसारा’को रेड कार्पेट प्रिमियर शो सम्पन्न भएको छ । ललितपुरको जवालाखेलमा बुधबार गरिएको शोमा चलचित्रकर्मीको बाक्लो उपस्थिति रहेको थियो ।

निर्देशकहरु निश्चल बस्नेत, प्रदीप भट्टराई लेखक तथा निर्देशक खगेन्द्र लामिछाने, अभिनेताहरु कर्मा शाक्य, विजय बराल, अभिनेतृ सुरक्षा पन्तलगायतको कार्यक्रममा उपस्थित थिए ।

प्रिमियरपछि फिल्मले उत्कृष्ट प्रतिक्रिया पाएको छ । अधिकांशले उपेन्द्र सुब्बाको लेखन र निर्देशनको तारिफ गरेका थिए । कलाकारको अभिनयले पनि उत्तिकै प्रशंसा पाएको छ ।

विशेषतः सामान्य पात्रका कथालाई गहनरुपले प्रस्तुत गर्न निर्देशक सुब्बा सफल भएको चलचित्रकर्मीहरूको प्रतिक्रिया छ । फिल्मले काठ क्षेत्रको परिवेशमा निसन्तान बुबा र एक्ली आमाबीचको प्रेम सम्बन्ध पेस गरेको छ ।

फिल्ममा अभिनेता प्रवीण खतिवडा र अभिनेतृ मिरुना मगर केन्द्रीय भूमिकामा छन् । अभिनेता दयाहाङ मुख्य भूमिकामा छन् भने गायक सत्यराज आचार्य र कवि विप्लव प्रतीकको विशेष भूमिकामा देखिएका छन् ।

सुब्बाको निर्देशन रहेको यो दोस्रो फिल्म हो । कबड्डी फिल्मस्को ब्यानरमा बनेको यस फिल्मका निर्माता छायाँकार शैलेन्द्र ध्वज कार्की हुन् । विष्णु कुमार लिम्बू मनोरथ पोखरेल, पर्शु अधिकारी, पिटर गुरुङ तथा जीवन लिम्बु थाक्लुङ सह-निर्माता हुन् ।