इन्टरपोल महासचिवालयको आयोजनामा फ्रान्सको लियोनमा वैशाख ११ देखि १३ सम्म सञ्चालित ‘१९औं हेड अफ एनसिबी कन्फरेन्स’मा सहभागी भएर प्रहरी महानिरीक्षक वसन्तबहादुर कुँवर बुधबार स्वदेश फर्किएका छन् ।

हेड अफ एनसीबी कन्फरेन्समा मुख्य रूपमा अन्तर्राष्ट्रियस्तरमा हुने अपराधहरूको नियन्त्रणबारे इन्टरपोलका सम्पूर्ण १९६ सदस्य राष्ट्रका एनसीबी प्रमुख, इन्टरपोल महासचिव तथा पदाधिकारीबीच समन्वय एवम् सहकार्यबारे छलफल भएको छ ।

सदस्य राष्ट्रहरूबीच अपराधीको विवरण आदानप्रदान, बालबालिकाको सुरक्षा, तथ्यांक सुरक्षाका एजेन्डामा छलफल तथा सहमति भएको प्रहरी महानिरीक्षक कुँवरको सचिवालयले जनाएको छ ।

एनसीबी नेपालका प्रमुखसमेत रहेका प्रहरी महानिरीक्षक कुँवरले आपराधिक घटनाको सूचना आदान प्रदान, अपराध अनुसन्धानको विषय तथा सम्बद्ध प्रहरी कर्मचारीको क्षमता वृद्धि एवम् पारस्परिक सहयोग आदान प्रदानबारे भारत, चीन र मलेसियाका प्रतिनिधिसँग छलफल पनि गरेका छन् ।

प्रहरी महानिरीक्षक कुँवर कन्फरेन्समा सहभागी हुन वैशाख १० मा  फ्रान्स गएका थिए । कन्फरेन्समा प्रहरी उपरीक्षक रवीन्द्र बहादुर सिंह पनि सहभागी भए ।