काठमाडौं- नेकपा माओवादी केन्द्र का महासचिव देव गुरुङले अहिलेको अवस्थामा वर्तमान सरकारको विकल्प नभएको बताएका छन् ।

बुधबार काठमाडौंमा आयोजित एक कार्यक्रममा गुरुङले मुलुकको विकास र समृद्धिका लागि वर्तमान सरकारको ध्यान केन्द्रित भएको तर्क गरे ।

उनले अहिले नै यो सरकारको विकल्प नभएको बताएका छन् । गुरुङले सापेक्षित रुपमा वर्तमान सरकार लामो समय टिक्ने बताए ।

सरकारमा रहेका घटकहरू न्यूनतम साझा कार्यक्रम र एजेण्डामा दृढताका साथ अघि बढ्दासम्म सरकारमा कुनै समस्या नहुने उनको भनाइ छ ।

राष्ट्रिय स्वाधीनताका साथै देश र जनतालाई हितमा राख्दै सरकारले काम गरिरहेको उनले बताए ।

गुरुङले राष्ट्रियता र जनताको मुद्दाहरूमा कम्युनिष्टहरू दृढ रहेको धारणा राखे ।

त्यस्तै महासचिव गुरुङले नेपालको समृद्धिका लागि आन्तरिक स्रोत मुख्य भए पनि बाह्य पूँजीको पनि भूमिका महत्पवपूर्ण रहेकाले लगानी सम्मेलनले त्यसमा प्रोत्साहित गरेको उल्लेख गरे ।