काठमाडौँ– प्रधानमन्त्री कप पुरुष एकदिवसीय राष्ट्रिय क्रिकेटमा आज लिग चरणका अन्तिम दुई खेल हुँदैछन् ।

आज कीर्तिपुरस्थित टीयू मैदानमा गण्डकी प्रदेश र त्रिभुवन आर्मी क्लब तथा मूलपानी क्रिकेट मैदानमा नेपाल पुलिस क्लब र सुदूरपश्चिम प्रदेशबीच प्रतिस्पर्धा हुँदैछ । दुवै खेल बिहान सवा ९ बजे सुरु हुनेछन् ।

प्रतियोगितामा अहिलेसम्म नेपाल पुलिस क्लब मात्र अपराजित रहेको छ। नेपाल पुलिस क्लब आफ्नो ८ खेलमा सबै खेल जितेर १६ अंकसहित शीर्ष स्थानमा रहेको छ र पुलिसले फाइनलमा आफ्नो स्थान सुनिश्चित गरिसकेको छ ।

त्यस्तै त्रिभुवन आर्मी क्लब ८ खेलमा ६ खेल जितेर १२ अंकसहित दोस्रो स्थानमा उक्लिएको छ । साथै फाइनलमा पुग्ने सम्भावना बलियो रहेको छ ।

त्यसैगरी बागमती प्रदेशले आफ्ना ९ खेलमा १२ अंक नै  हासिल गर्दै तेस्रो स्थानमा छ भने मधेश प्रदेश पनि आफ्ना ९ खेलमा १२ अंकसहित चौथो स्थानमा रहेको छ ।

एपीएफ क्लब ९ खेलमा १० अंकसहित पाँचौं स्थानमा रहेको छ भने सुदूरपश्चिम प्रदेशले ८ खेलमा ४ जितसहित ८ अंक हासिल गरेर छैटौँ स्थानमा रहेको छ। कर्णाली प्रदेश ९ खेलमा ८ अंकसहित सातौँ स्थानमा छ।

त्यसैगरी गण्डकी प्रदेशले ८ खेलमा २ जितसहित ४ अंक हासिल गर्दै आठौँ स्थानमा छ भने लुम्बिनी प्रदेशले आफ्ना ९ खेलमा एक जित र ८ हार बेहोरेर नवौँ स्थानमा छ। त्यस्तै कोशी प्रदेशले खेलेका ९ खेलमा एक जित र ८ खेलमा हार बेहोरेर पुछारमा रहेको छ।