काठमाडौँ– बलिउडका नायकहरूलाई सार्वजनिक कार्यक्रममा सहभागी हुन बडिगार्ड बिना सम्भव हुँदैन । उनीहरूलाई हजारौँ समर्थकले घेर्दा गन्तव्यमा पुर्‍याउने जिम्मेवारी बडिगार्डकै हुन्छ ।

बलिउडका धेरै कलाकारले लामो समयसम्म एकै बडिगार्ड राखेका छन् । उनीहरूलाई मासिक मोटो रकम तलब दिएर ती कलाकारले आफ्नो सुरक्षाका लागि राखेका छन् ।

शाहरुखका बडिगार्ड सबैभन्दा महँगा
शाहरुख खान सबैभन्दा बढी फ्यान फलोइङ भएका नायक हुन् । उनी धनी कलाकार पनि हुन् । उनलाई बडिगार्डको सहायताबिना बाहिर निस्कन सम्भव नै छैन भन्दा फरक पर्दैन ।

शाहरुखका बडिगार्डको नाम रवि सिंह हो । उनले सुरक्षा दिए वापत् शाहरुखबाट मासिक २५ लाख भारु तलब बुझ्छन् । अर्थात् शाहरुखले एउटै बडिगार्डका लागि वार्षिक तीन करोड खर्च गर्छन् । भारतीय मिडियाका अनुसार रवि नै बलिउडका महँगा बडिगार्ड हुन् ।

कसका बडिगार्डले कति लिन्छन् तलब ?
बलिउडका सेलिब्रेटी हुन् शेरा । सलमान खानलाई लामो समयदेखि सुरक्षा दिइरहेका शेराको मासिक तलब १५ लाख भारु हो ।

सुरक्षा दिए वापत् सलमानले शेरालाई वार्षिक दुई करोड तलब दिन्छन् । शेरा पछिल्लो २९ वर्षदेखि सलमानको साथमा छन् ।

त्यस्तै, अर्का नायक अमिर खानले पनि बडिगार्ड युवराज घोरपडेलाई मोटो रकम बुझाउँछन् । घोरपडेको वार्षिक तलब पनि शेराको जत्तिकै छ । अर्थात् अमिरले घोरपडेलाई वार्षिक दुई करोड बुझाउनुपर्छ ।

अक्षय कुमारका बडिगार्ड श्रेयस ठेले हुन् । उनले अक्षयबाट वार्षिक एक करोड २० लाख भारु बुझ्छन् ।