काठमाडौँ– प्रधानमन्त्री कप महिला टी–२० राष्ट्रिय क्रिकेट प्रतियोगितामा एपीएफ क्लब फाइनलमा प्रवेश गरेको छ ।

आज किर्तिपुरस्थित त्रिवि क्रिकेट मैदानमा आज भएको पहिलो क्वालिफायरमा कोशी प्रदेशमाथि ५२ रनको सहज जित निकाल्दै एपीएफले फाइलनमा स्थान सुरक्षित गरेको हो ।

एपीएफले दिएको १ सय ४० रनको लक्ष्य पछ्याएको कोशी प्रदेश निर्धारित २० ओभरमा ४ विकेट गुमाउँदै ८७ रनमा समेटियो ।

कोशीकी अप्सरी बेगमले सर्वाधिक ३१ रन जोडिन् । यस्तै, रुबिना क्षेत्रीले २२ तथा लकिता राजवंशीले १४ रन बनाए ।

एपीएफकी सोनु खड्का, रेखा रावल, सुमन विष्ट र सीता राना मगरले १–१ विकेट लिए ।

यसअघि, टस हारेर पहिले ब्याटिङ गरेको एपीएफले निर्धारित २० ओभरमा २ विकेटको क्षतिमा १ सय ३९ रन बनाएको थियो ।

एपीएफकी इन्दु बर्माले ५६ रनको अर्धशतकीय पारी खेलिन् । यस्तै, सीता राना मगरले ४५, रोमा थापाले १८ तथा ज्योति पाण्डेले १२ रन जोडे ।कोशीकी रुबिना क्षेत्रीले १ विकेट लिइन् ।

अब कोशी प्रदेशले फाइनल प्रवेशका लागि दोस्रो क्वालिफायरमा बागमती र सुदूरपश्चिमबीच हुने एलिमिनेटरको विजेतासँग खेल्ने छ ।