इस्लामावाद– पाकिस्तानमा न्यायाधीशको घरमा काम गर्दै आएकी १४ वर्षे नाबालिगलाई यातना दिइएको घटना सार्वजनिक भएको छ । घटना पाकिस्तानको सरगोधा क्षेत्रमा भएको हो ।

पाकिस्तान पाकिस्तानी समाचार संस्था जियो न्युजका अनुसार न्यायाधीश असिम हफिजको घरमा काम गर्दै आएकी १४ वर्षीया बालिकालाई कुटपिट गरी गम्भीर घाइते बनाएको घटना सार्वजनिक भएको हो ।

ती नाबालिगलाई न्यायाधीशकी श्रीमतीले यातना दिएको र दुर्व्यवहार गरेको जनाइएको छ । पीडितका अभिभावकका अनुसार गहना चोरी गरेको आरोपमा न्यायाधीशकी श्रीमतीले ती नाबालिगलाई मुङ्ग्रोले कुटपिट गरेकी थिइन् ।

कुटपिटपछि अवस्था गम्भीर भएपछि न्यायाधीशकी श्रीमतीले पीडितलाई उनकै अभिभावकको घरअघि लगेर छाडेकी थिइन् । कुटपिटबाट घाइते भएकी नाबालिगलाई अस्पताल भर्ना गरिएको छ ।

ती नाबालिगलाई घरेलु कामदारका रुपमा न्यायाधीशको घरमा पठाएको आरोपमा प्रहरीले मुख्तार नाम गरेका एक जनालाई पक्राउ गरेको छ ।