काठमाडौँ– चिप बनाउने अमेरिकी कम्पनी एडभान्स्ड माइक्रो डिभाइस (एएमडी) ले आगामी पाँच वर्षमा भारतमा ४०० मिलियन डलर लगानी गर्ने घोषणा गरेको छ ।

भारतीय प्रधानमन्त्री नरेन्द्र मोदीको उपस्थितमा शुक्रबार सुरु भएको सेमिकन्डक्टरसम्बन्धी सम्मेलनमा कम्पनीका प्रमुख प्राविधिक अधिकृत मार्क पेपरमास्टरले भारतको बैंगलुरुमा सबैभन्दा ठूलो डिजाइन सेक्टर निर्माण गर्ने बताए ।

भारतीय अखबार द हिन्दूले जनाएअनुसार कम्पनीले आफ्नो डिजाइन सेन्टरको यसवर्षको अन्त्यमा सुरुवात गर्नेछ । आगामी ५ वर्षमा ३ हजार नयाँ इञ्जिनियरिङ क्षेत्रको जागिर सिर्जना गर्ने प्रमुख प्राविधिक अधिकृत मार्कले बताए । 

यस्तै सो अवधिमा ५ लाख स्क्वायर फुटमा एएमडीको नयाँ डिजाइन सेन्टरको सुरुवात हुनेछ । यो सुरुवात हुँदा भारतमा एएमडीका १० कार्यालय रहनेछन् ।

उनले भनेका छन्, ‘भारतीय टोलीले उच्च क्षमता र समस्याको समाधान गर्ने किसिमका चिपहरुको निर्माणमा महत्वपूर्ण भूमिका खेल्नेछ । यसले विश्वभरमै एएमडीका ग्राहकहरूलाई सहयोग पुग्नेछ ।’