काठमाडौँ- भूमध्य सागरको बाटो भएर युरोपतर्फ जान खोज्ने ३३१ आप्रवासीलाई उद्धार गरी लिबिया फर्काइएको अन्तर्राष्ट्रिय आप्रवासन संगठन आईओएमले जनाएको छ ।

एक हप्ताको अवधिमा ३३१ जना आप्रवासीलाई उद्धार गरी लिबिया फर्काइएको आईओएमले जानकारी दिएको हो । सन् २०२३ को जनवरी २२ देखि जनवरी २८ सम्मको अवधिमा ३३१ आप्रवासीहरूलाई रोकेर लिबिया फर्काइयो आईओएमले विज्ञप्तिमार्फत जानकारी दिएको हो ।

उद्धार गरिएका आप्रवासीमा २० महिला र ३५ बालबालिका समेत रहेका छन् । यस वर्ष अहिलेसम्म कुल १ हजार एक सय ३ आप्रवासीलाई उद्धार गरी लिबिया फर्काइएको छ ।

उत्तर अफ्रिकी तटबाट भूमध्य सागरको बाटो हुँदै युरोप प्रवेश गर्न खोज्ने १७ जना आप्रवासीको मृत्यु भएको छ भने अरु १८ जना बेपत्ता भएको आईओएमले जनाएको छ ।

सन् २०२२ मा कुल २४ हजार छ सय ८४ आप्रवासीहरूलाई उद्धार गरी लिबिया फर्काइएको आईओएमले जनाएको छ । सन् २०२२ मा भूमध्य सागरीय मार्गमा ५ सय २९ आप्रवासीको मृत्यु भएको छ भने ८ सय ४८ जना बेपत्ता भएका छन् ।