काठमाडौं- अफ्रिकी क्षेत्रबाट युगाण्डा टी–२० विश्वकपमा छनोट भएको छ ।

युगाण्डाले विश्वकप छनोट अन्तर्गतको अन्तिम खेलमा बिहीबार रुवाण्डालाई ९ विकेटले पराजित गर्दै २०२४ मा हुने टी–२० विश्वकपमा आफ्नो स्थान सुरक्षित गरेको हो ।

रुवाण्डाले दिएको ६६ रनको लक्ष्य पछाएको युगाण्डाले ८.१ ओभरमा एक विकेट गुमाउदै लक्ष्य पूरा गरेको थियो । यसअघि पहिला ब्याटिङ गर्दै रुवाण्डाले १८.५ ओभरमा अलआउट हुदै ६५ रन मात्र बनाएको थियो ।

योसँगै युगाण्डा पहिलो पटक टी–२० विश्वकपमा छनोट भएको छ । अफ्रिकी क्षेत्रबाट नामिबिया र युगाण्डा छनोट भएसँगै टेस्ट खेल्ने देश जिम्बाब्वे टी–२० विश्वकपमा छनोट हुन असफल भएको छ । जिम्बाब्वे यसअघि ६ पटक टी–२० विश्वकप खेलेको थियो ।

साथै यसअघि २००७ मा टी–२० विश्वकप खेलेको केन्या पनि विश्वकपमा छनोट हुन असफल भएको छ । ७ देशले विश्वकपको छनोटमा भाग लिएकोमा रुवाण्डा, तान्जानिया, नाइजेरिया भने यसअघि नै बाहिरिसकेका थिए ।