काठमाडौँ– अमेरिकाका पूर्वविदेशमन्त्री हेनरी किसिन्जरको निधन भएको छ । बुधबार १०० वर्षको उमेरमा कनेक्टिकटमा किसिन्जरको निधन भएको हो ।

सन् १९२३ मा जर्मनीमा जन्मेका किसिन्जरले सन् १९६९ देखि १९७५ सम्म अमेरिकाको राष्ट्रिय सुरक्षा सल्लाहकार र सन् १९७३ देखि १९७७ सम्म विदेशमन्त्रीको जिम्मेवारी सम्हालेका थिए ।

शीतयुद्धका बेला अमेरिकी विदेश नीति र कूटनीतिक क्षेत्रमा उनको भूमिका निकै महत्वपूर्ण मानिन्छ । साम्यवादी चीनसँग अमेरिकाको सम्बन्ध स्थापना गर्न पनि किसिन्जरको भूमिका महत्त्वपूर्ण मानिन्छ । भियतनाम युद्व अन्त्य गर्न पेरिस शान्ति सम्झौतामा हस्ताक्षर गरेबापत उनले सन् १९७३ मा नोबेल शान्ति पुरस्कार पनि प्राप्त गरेका थिए ।

जर्मनीको यहूदी परिवारमा जन्मेका किसिन्जर हिटलरले यहूदी विरोधी दमन सुरु गरेपछि सन् १९३८ मा शरणार्थीका रूपमा अमेरिका पुगेका थिए ।

रिचर्ड निक्सन राष्ट्रपति हुँदा विदेशमन्त्री रहेका उनले वाटरगेट काण्डमा निक्सनले राजीनमा दिएपछि जेराल्ड फोर्डको कार्यकालमा पनि विदेशमन्त्रीकै जिम्मेवारी सम्हालेका थिए । उनले केही समयअघि मात्रै चीनको भ्रमण गरी उच्चस्तरीय भेटवार्ता गरेका थिए ।

आफ्नै घरमा निधन भएको जनाइए पनि कस्तो अवस्थामा उनको निधन भएको हो, अझै स्पष्ट नभएको रोयटर्सले जनाएको छ । पारिवारिक समारोहमा उनको अन्त्येष्टि गरिने र पछि न्यूयोर्कमा सार्वजनिक स्मृतिसभा आयोजना गरिने रोयटर्सले जनाएको छ ।