रुपन्देही – लुम्बिनी प्रदेशका मुख्यमन्त्री डिल्लीबहादुर चौधरीले दाङको तुलसीपुरस्थित राप्ती प्रादेशिक अस्पताललाई दुई सय शय्याको बनाउने बताएका छन्।

सोह्रौँ गणतन्त्र दिवसका अवसरमा आज अस्पतालका बिरामीलाई फलफूल वितरण कार्यक्रममा उनले ५० शय्याको मान्यता पाएको यस अस्पताललाई विस्तार गरिने बताए । “हामीले यो अस्पताललाई दुईसय शय्या बनाउँछौँ”, उनले भने, “त्यसपछि सेवा प्रभावकारी हुन्छ ।” लुम्बिनीमा दुई वटा प्रादेशिक अस्पताललाई अन्य अस्पतालको स्रोत केन्द्रका रुपमा विकास गर्नेसमेत मुख्यमन्त्री चौधरीले बताए।

कार्यक्रममा प्रदेशका आर्थिक मामिलामन्त्री धनबहादुर मास्कीले स्वास्थ्य सेवालाई सामान्य नागरिकको पहुँचमा पुर्याउन आफूहरु प्रतिबद्ध रहेको बताए । प्रदेशका स्वास्थ्यमन्त्री राजु खनालले प्रादेशिक अस्पताललाई दुई सय शय्याको बनाउनका लागि प्रक्रिया अघि बढेको बताए । त्यस अवसरमा अस्पताल विकास समितिका अध्यक्ष पदमप्रसाद न्यौपानेले अस्पताललाई दुई सय शय्याको बनाउनका लागि ओएमएन सर्वे गरेर प्रदेश सरकारमा पठाएको भन्दै त्यसमा सुनुवाइ हुनपर्ने बताए ।