बेइजिङ- चीनमा जनमुक्ति सेनामाथि व्यङ्ग्य गर्ने हाँस्य कलाकारको समर्थन गरेको आरोपमा एक जना महिला पक्राउ परेकी छिन् ।

चिनियाँ जनमुक्ति सेनामाथि व्यङ्ग्य गर्ने हाँस्य कलाकार ली हाओशीको समर्थन गर्दै अनलाइनमा पोस्ट गरेको आरोपमा ३४ वर्षीया महिलालाई पक्राउ गरिएको बेलायतबाट प्रकाशित हुने द गार्जियनले जनाएको छ ।

यसअघि ली हाओशीले चिनियाँ जनमुक्ति सेनाप्रति व्यङ्ग्य गर्दै दुई वटा कुकुरले लोखर्केलाई लखेटेको भनी टिप्पणी गरेको अडियो भाइरल भएको थियो । त्यसपछि चिनियाँ सुरक्षा अधिकारीले सन् २०२१ मा अघि सारिएको कानूनअनुसार हाओशीविरुद्ध अनुसन्धान अघि बढाएका थिए । उक्त कानूनअनुसार चिनियाँ जनमुक्ति सेनामाथिको आलोचनालाई अपराध मानिएको छ ।

यस घटनापछि ली हाओशीका रोजगारदातालाई १६ लाख ८० हजार पाउण्ड बराबरको जरिवाना तिराइएको थियो । पछि ती ३४ वर्षीया महिलाले ली हाओशीको समर्थनमा पोस्ट गरेकी थिइन् ।

ती महिलाले आफ्नो अपराध स्वीकार गरेको चिनियाँ अधिकारीलाई उद्धृत गर्दै गार्जियनले जनाएको छ ।