काठमाडौं– स्वास्थ्य तथा जनसङ्ख्यामन्त्री पदम गिरीले सबै जनताको पहुँचमा स्वास्थ्य सेवालाई पुर्‍याउने प्रयासमा सरकार लागिरहेको बताएका छन् । कोभिड- १९ खोप, नियमित खोप तथा दादुरी-रुबेला प्रकोपको तयारी र प्रतिक्रियाका लागि परिवार कल्याण महाशाखाले आयोजना गरेको  राष्ट्रिय समीक्षा कार्यक्रममा बोल्दै उनले यस्तो धारणा राखेका हुन् । 

मन्त्री गिरीले सबैको पहुँचमा स्वास्थ्य सेवालाई पुर्‍याउनका लागि जनशक्ति र पूर्वाधार थपिने बताएका छन् । ‘जनतामा स्वास्थ्यमा आधारभूत परिवर्तन आयो है भन्ने महसुस गराउनेगरी हामी भविष्यमा आउँछौं,’ उनले भने । उनले खोप अभियानलाई सफल बनाउनका लागि केही पक्षमा विशेष ध्यान दिनुपर्ने बताए । 

उनले खोप अभियानलाई सफल बनाउन जनप्रतिनिधि, युवा समूह तथा संघ-संस्थाहरुको महत्वपूर्ण भूमिका रहने बताए । ‘स्थानीय तह २० वर्षसम्म कर्मचारीले चलाएको अवस्था थियो । अहिले त जनप्रतिनिधि छन् । नगर-गाउँसभा बस्छ । खोपको एजेन्डा पनि त्यहाँ राख्न लगाउनुस् न,’ सरोकारवालाहरुलाई उनले भने, ‘हाम्रा समूहहरु छन्, युवा समूह, विभिन्न संघ संस्था छन् । त्यहाँ समन्वय र छलफल गर्ने गरौँ, मुलकलाई पूर्ण खोपयुक्त बनाउन लागौं । 

खोप अभियानमा शतप्रतिशत सफलता हासिल गर्नका लागि सबै मिलेर अघि बढ्नुपर्नेमा उनको जोड छ ।