वार्सा- पोल्याण्डले रुससँगको फिन्निश सीमानजिक सेना पठाउने तयारी थालेको छ । रुसले युक्रेनमा आक्रमण जारी राखेका बेला पोल्याण्डले रुसको छिमेकी फिनल्याण्डमा सेना पठाउने तयारी थालेको हो ।

पोल्याण्डले फिनल्याण्डमा ‘सैन्य सल्लाहकारहरुको समूह’ पठाउन लागेको पोल्याण्डको राष्ट्रिय सुरक्षा ब्युरोका प्रमुख ज्यारेक सिवेरियाले जनाएका छन् । रुस–फिनल्याण्ड सीमानजिकै हाइब्रिड आक्रमणको जोखिमलाई मध्यनजर गर्दै साझेदारहरुको औपचारिक आग्रहमा यस्तो तयारी थालिएको उनको भनाइ छ ।

फिनल्याण्डले हालैमात्र रुससँगको सीमाना बन्द गरेको छ । यसबारे फिनल्याण्डका अधिकारीहरुले कुनै टिप्पणी नगरेको रोयटर्सले जनाएको छ ।

यता रुसले भने फिनल्याण्डसँगको आफ्नो सीमानजिक सेना पठाउने पोल्याण्डको तयारीबारे आक्रोशपूर्ण प्रतिक्रिया दिएको छ । रुसी प्रशासन क्रेमलिनले यस्तो कदमले उत्तेजना बढाउने र आफ्नो मुलुकले यसलाई धम्कीका रुपमा लिने चेतावनी दिएको छ ।

क्रेमलिनका प्रवक्ता दिमित्री पेश्कोभले रुस फिनल्याण्ड सीमामा कुनै जोखिम नरहेको भन्दै सेना पठाउने पोल्याण्डको तयारीको कुनै औचित्य नरहेको बताएका छन् ।