काठमाडौं – नेपाली कांग्रेसले आफू संविधान कार्यान्वयन गर्ने विषयमा प्रतिबद्ध रहेको बताएको छ ।

पार्टी सभापति शेरबहादुर देउवाको निवास धुम्बाराहीमा बसेको पदाधिकारी र पूर्वपदाधिकारीको बैठकपछि प्रचार विभाग प्रमुख मिन विश्वकर्माले कांग्रेस संविधानभन्दा बाहिर नजाने बताए ।

पछिल्लो समय भइरहेका व्यवस्था विरोधी गतिविधिप्रति पार्टी सचेत रहेको भन्दै विश्वकर्माले अहिले यो पार्टीमा छलफलको विषय नबनेको बताए । तर, व्यवस्था विरोधी गतिविधिप्रति पार्टी सचेत रहेको उनको भनाई छ ।

बैठकले आर्थिक क्षेत्रमा देखिएका समस्या समाधानका लागि पार्टीले अर्थमन्त्रीलाई पार्टीको केन्द्रीय कमिटी बैठकमा राखेर सुझाव दिने निर्णय भएको उनले जानकारी दिए । बैठकले पार्टीका मन्त्रीहरुबाट अहिलेसम्म भएका प्रगतिबारे जानकारी लिएको प्रचार विभाग प्रमुख विश्वकर्माले बताए ।

सरकारले भूकम्प पीडितको अस्थायी आवास निर्माणका लागि रकम पठाइसकेको तर स्थानीयको हातमा नपुगेकामा आफूहरु गम्भीर रहेको उपप्रधान तथा रक्षामन्त्री र अर्थमन्त्रीले बैठकमा बताएकोे उनले सुनाए ।

सरकारले अस्थायी आवास निर्माणको लागि दिने भनिएको ५० हजार एकैपटक दिन सरकारसँग कांग्रेसले माग गरेको उनले बताए ।

पार्टी सभापति देउवाले धर्म निरपक्षेताका विषयमा बोलेको विषय नितान्त व्यक्तिगत भएको भन्दै उनले यसको बारेमा पार्टीमा छलफल नभएको तर्क गरे ।

बैठकमा महासमितिको बैठकको तयारीबारे छलफल भएको उनले जानकारी दिए । पछिल्लो सयम उठेका सबै विषयलाई महासमिति बैठकले जवाफ दिने उनको भनाई छ ।

यो पनि..