एजेन्सी – यसवर्षको मुम्बई फिल्म फेस्टिभल सुरु भएको छ । मुम्बईस्थित नीता अम्बानी कल्चरल सेन्टरमा आयोजित फेस्टिभलको उद्घाटन समारोहमा चर्चित बलिउड सेलिब्रिटीले रेडकार्पेट नापे ।

कोरोना महामारीपछि पहिलोपटक भौतिकरुपमा आयोजना गरिएको यो फेस्टिभल नोभेम्बर ५ सम्म चल्नेछ । दश दिनसम्म हुने फेस्टिभलमा ७० भाषाका २५० फिल्म स्क्रिनिङ हुने जनाइएको छ ।

जियो मामी समेत भनिने फेस्टिभल अध्यक्ष प्रियंका चोपडा जोनसले मास्टर सेरेमोनी प्रस्तुत गरेसँगै महोत्सव सुरु भयो । दिग्गज फिल्म निर्देशक मणिरत्नम र लुका गुआडाग्निनोलाई एक्सलेन्स इन सिनेमा अवार्डबाट सम्मानित गर्दै फेस्टिभल सुरु भएको थियो । कमल हसन र प्रियंकाले उनीहरुलाई पुरस्कार प्रदान गरे ।

फेस्टिभलमा नेपालबाट ‘गाउँ आएको बाटो’ दक्षिण एसिया प्रिमियर हुँदैछ । ‘द रेड सुटकेस’ र ‘गुराँस’ पनि साउथ एसिया अन्तर्गतको प्रतिस्पर्धामा छन् । दिवा शाहको निर्देशन र नेपाल र भारतको सहकार्यमा निर्माण भएको ‘बहादुर स् द ब्रेभ’ समेत प्रतिस्पर्धामा छ ।

छोटो फिल्मको विधामा आयारुस पौडेलको ‘हेलेना’ र ‘विन्डहर्स्’ पनि प्रतिस्पर्धामा छन् । विदुषी गिरीको लेखन र निर्देशनमा निर्माण भएको छोटो फिल्म ‘चिसो घर’को वल्र्ड प्रिमियर हुँदैछ । यो फिल्म ‘फोकस साउथ एसिया’ विधा अन्तर्गत छनोट भएको हो ।

स्रोत : एएनआई