इस्लामावाद- पाकिस्तानमा अल्पसङ्ख्यक अहमदिया सम्प्रदायका मुसलमानको प्रार्थानास्थलमा तोडफोड गरिएको अर्को घटना सार्वजनिक भएको छ । कराँची सहरस्थित हाइ रोडमा रहेको अहमदिया सम्प्रदायका मुसलमानको प्रार्थानास्थलमा तोडफोड गरिएको घटना सार्वजनिक भएको हो ।

स्थानीय सुरक्षा अधिकारीलाई उद्धृत गर्दै पाकिस्तानबाट प्रकाशित हुने डन अखबारले जनाएअनुसार उक्त प्रार्थानास्थलमा तोडफोड गरिएको थियो भने अहमदियाप्रति घृणा फैलाउने सन्देश पनि लेखिएको थियो । समाचारमा जनाइएअनुसार उक्त स्थानमा करिब एक दर्जन मानिसहरु जबरजस्ती पसेर तोडफोड गरेका थिए ।

घटनाबारे उजुरी दर्ता गराइएको र दोषीमाथि आवश्यक कारवाही अघि बढाइने प्रहरीले जनाएको छ । यसअघि पनि पाकिस्तानका विभिन्न स्थानहरुमा अहमदिया समुदायको चिहान र प्रार्थानास्थल भत्काइएको समाचार सार्वजनिक हुँदै आएका छन् ।

इस्लाम धर्म मान्ने भएपनि पाकिस्तानले अहमदियाहरुलाई मुसलमानको सूचीमा नराख्ने गरेको बताइन्छ । अल अरबिया पोस्टका अनुसार पाकिस्तानी अपराध संहिताको २९८ धाराअनुसार अहमदियाहरुले आफूलाई मुसलमान भन्न र आफ्नो आस्थाको प्रचार गर्न पाउँदैनन् । पाकिस्तानमा अहमदियाहरुलाई इस्लामिक चिह्न र पहिचानको प्रयोग गर्न पनि प्रतिबन्ध लगाइएको छ ।

पाकिस्तानमा ४० लाख अहमदिया मुसलमानहरुको बसोबास छ । पछिल्ला केही वर्षयता अहमदियाहरु पाकिस्तानमा हिंसा र लज्जाको सिकार हुँदै आएको भारतीय समाचार संस्था एएनआईले जनाएको छ ।