सिड्नी– अष्ट्रेलियाको एक सैनिक हेलिकप्टर क्वीन्सल्याण्डको तटीय क्षेत्रस्थित ह्यामिल्टन टापुमा दुर्घटनाग्रस्त भएको छ । 

दुर्घटनामा चालक दलका चार सदस्य बेपत्ता रहेको बताइएको छ । सेनाको हेलिकप्टर अमेरिकासँगको संयुक्त सैन्य अभ्यासमा सहभागी भइरहेका बेला दुर्घटना भएको बीबीसीले जनाएको छ । 

अष्ट्रेलियाका रक्षामन्त्री रिचार्ड मर्ल्सले तत्कालै खोजी तथा उद्धारको अभियान तत्कालै सुरु गरिएको जानकारी दिए । रक्षामन्त्री मर्ल्सका अनुसार एमआरएच–९० टाइपान हेलिकप्टर टापु नजिकै स्थानीय समयअनुसार राति साढे १० बजे दुर्घटनाग्रस्त बनेको थियो ।

दुर्घटनापछि ‘अपरेशन तालिजमान साब्रे स्थगित गरिएको छ । रिपोर्टका अनुसार तालिजम्यान साब्रेको समयमा अमेरिकी मरीन र अस्ट्रेलियाली सैनिकहरू ह्वाइट सन्डेमा सँगै अभ्यास गरिरहेका थिए।

अमेरिका, फ्रान्स र अष्ट्रेलियालगायत १३ देशको तालिजमान साब्रे’मा करिब ३० हजार सैनिक सहभागी छन् । पपुवा न्युगिनी, फिजी र टोंगा पहिलो पटक सहभागी हुँदैछन् ।