इस्लामावाद- पाकिस्तानमा ह्वाट्सएप ग्रुपमा ईशनिन्दा गरेको आरोपमा ५ जनाविरुद्ध उजुरी दायर भएको छ । पाकिस्तानको आरिफवाला क्षेत्रमा प्रहरीले ह्वाट्सएप ग्रुपमा ईशनिन्दा गरेको आरोपमा उक्त ग्रुपका तीन सदस्य र दुई जना एडमिनविरुद्ध उजुरी दर्ता गरेको हो ।

स्थानीय शान्ति समितिले उनीहरुविरुद्ध उजुरी दिएको पाकिस्तानबाट प्रकाशित हुने डन अखबारको अनलाइन संस्करणले जनाएको छ ।
प्रहरीले पाकिस्तानी दण्ड संहिताको धारा २९५ को उपधारा ए बमोजिम उनीहरुविरुद्ध उजुरी दर्ता गरेको डनले जनाएको छ ।

उनीहरुले ह्वाट्सएपमार्फत धार्मिक सम्प्रदायविरुद्ध घृणा फैलाएको आरोप लगाइएको छ । पाकिस्तानी ईशनिन्दा कानूनलाई निकै विवादास्पद मानिन्छ ।

ईशनिन्दा गरेको आरोपमा धार्मिक तथा साम्प्रदायिक अल्पसङ्ख्यकलाई निशाना बनाउने गरिएको भन्दै अन्तर्राष्ट्रिय मानव अधिकारवादी संस्थाहरुले आलोचना गर्दै आएका छन् ।