काठमाडौँ– भारतले हिन्दीलाई विश्वभाषा बनाउने प्रयास थालेको छ। विश्व संगठनमा हिन्दी भाषाको प्रयोगलाई प्रवर्द्धन गर्न र समावेशी संवाद र समझदारीलाई बढावा दिन भारतले संयुक्त राष्ट्र संघलाई १० लाख  अमेरिकी डलर योगदान गरेको छ । 

संयुक्त राष्ट्रका लागि भारतका स्थायी प्रतिनिधि रुचिरा कम्बोजले संयुक्त राष्ट्र संघको ग्लोबल कम्युनिकेसन विभागकी उपमहासचिव मेलिसा फ्लेमिङलाई १० लाख अमेरिकी डलरको चेक हस्तान्तरण गरेकी हुन्  । यसबाट अन्तर्राष्ट्रिय मामिलामा हिन्दी भाषीको संलग्नता बढ्ने भारतीय प्रतिनिधिको विश्वास छ । 

‘हिन्दी भाषामा समाचार र मल्टिमिडिया सामग्रीलाई मूलधारमा राख्ने र एकीकृत गर्ने संयुक्त राष्ट्र संघको प्रयासलाई भारत र हिन्दी भाषी जनसंख्या बसोबास गर्ने देशहरूमा प्रशंसा गरिएको छ,’ उनले भनिन्। उनले भारत सरकारले संयुक्त राष्ट्र संघमा हिन्दी भाषाको प्रयोगलाई निरन्तरता दिने बताएकी छिन् ।