काठमाडौं – नेकपा (एमाले) का उपमहासचिव प्रदीप ज्ञवाली र चिनियाँ कम्युनिस्ट पार्टीकी विदेश विभाग उपमन्त्री सुन हाइयानबीच आज बेइजिङमा भेटवार्ता भएको छ ।

भेटमा दुई पार्टीबीच रहँदै आएको मैत्रीपूर्ण सम्बन्धका विषयमा कुराकानी भएको बताइएको छ । भेटमा उपमन्त्री सुनले एमाले अध्यक्ष केपी शर्मा ओली प्रधानमन्त्री भएको बेला दुई देशबीच महत्वपूर्ण सम्झौता भएको स्मरण गर्दै तिनको सफल कार्यान्वयन हुने विश्वास व्यक्त गरिन ।

सोही समयमा नेपाल–चीनबिचको सम्बन्ध रणनीतिक साझेदारीमा स्तरोन्नति भएको उल्लेख ज्ञवालीले विगतका सहमति तथा सम्झौता कार्यान्वयन गर्न आफ्नो पार्टी प्रतिबद्ध रहेको बताएका थिए ।

भेटमा एमालेका केन्द्रीय कमिटी सदस्य विष्णु रिजालका साथै चिनियाँ कम्युनिस्ट पार्टीका अधिकारीहरूको सहभागिता थियो ।