काठमाडौँ- नेपाली कांग्रेसकी सांसद आरजु राणा देउवाले संसदको कृषि, सहकारी तथा प्राकृतिक स्रोत समितिको सभापति पदमा उम्मेदवारी दर्ता गराएकी छिन् ।

संघीय संसद सचिवालयमा आइतबार उनले उम्मेदवारी दर्ता गराएकी हुन् । प्रमुख दहरुले १२ वटा संसदीय समितिमा नेतृत्वको भागबण्डा गरेअनुसार उनले उम्मेदवारी दिएकी हुन् । उनको प्रस्तावकमा कांग्रेसका वीरबहादुर बलायर र समर्थकमा नेकपा एमालेका सूर्यप्रसाद ढकाल र नेकपा माओवादी केन्द्रकी रुपा चौधरी छन् ।

भागबण्डाअनुसार कांग्रेसले ४, एमालेले ३, माओवादीले केन्द्रले २ वटा संसदीय समितिको नेतृत्व गर्ने सहमति भएको थियो

त्यसैगरी, जनता समाजवादी पार्टी (जसपा) नेपाल, नेकपा एकीकृत समाजवादी र जनमत पार्टीले समान एउटा समितिको नेतृत्व लिने सहमति भएको थियो ।

अहिले भने माओवादीले आफूले पाएको एउटा समितिको नेतृत्व राष्ट्रिय प्रजातन्त्र पार्टी राप्रपालाई छाड्न तयार भएको छ । संसदको पूर्वाधार विकास समितिको सभापतिमा राप्रपाका सांसद दीपक सिंहले उम्मेदवारी दिएका छन् ।

दलीय भागबण्डामा माओवादीले पूर्वाधार विकाससँगै कानून, न्याय तथा मानवअधिकार समितिमा नेतृत्व पाएको थियो । तर, राप्रपाले प्रधानमन्त्री पुष्पकमल दाहाललाई पाचौँ ठूलो दलको हैसियतमा आफूहले कम्तीमा एउटा संसदीय समितिको नेतृत्व पाउनुपर्ने माग गरेपछि त्यसका लागि माओवादी तयार भएको हो ।