इस्लामावाद- पाकिस्तानको टेक्सटाइल निर्यात लगातार आठ महिनादेखि ओरालो लागेको पाइएको छ ।

पाकिस्तानी अखबार एक्सप्रेस ट्रिब्युनले जनाएअनुसार गत वर्षको तुलनामा यस वर्षको मे महिनामा पाकिस्तानबाट हुने टेक्सटाइलको निर्यात २० प्रतिशतले घटेको छ । यस आर्थिक वर्षको ११ महिनामा पाकिस्तानले १५ अर्ब डलरको टेक्सटाइल निर्यात गरेको जनाइएको छ ।

यसअनुसार पाकिस्तानको टेक्सटाइल निर्यात वार्षिक अनुपातमा १४ दशमलब ७ प्रतिशतले घटेको छ ।

यस तथ्यांकले मुलुकमा औद्योगिक क्षेत्रले भोगिरहेको चुनौतिलाई उजागर गरेको एक्सप्रेस ट्रिब्युनले उल्लेख गरेको छ । पछिल्लो समय पाकिस्तानले गम्भीर आर्थिक संकटको सामना गरिरहेको छ ।

पाकिस्तानको घट्दो टेक्सटाइल निर्यातका कारण उद्योगहरु धराशायी हुने र त्यहाँ काम गर्ने कामदारको रोजगारीमा पनि प्रश्न उठेको बताइएको छ ।