काठमाडौँ– सडक किनारामा सवारी पार्किङ निषेध गरेको विरोधमा काठमाडौंको दरबारमार्ग क्षेत्रका व्यवसायीहरूले प्रदर्शन गरेका छन् । सवारी पार्किङ निषेध गर्ने काठमाडौं महानगरको निर्णयको विरोधमा व्यवसायीहरूले सोमबार अपराह्न आधा घण्टा पसल बन्द गरेर सडकमा प्रदर्शन गरेका हुन् । 

सवारी आवागमनमा नै असर पुग्नेगरी दरबारमार्ग क्षेत्रमा पार्किङ गरेको भन्दै महानगरले दुई महिनाअघि सो क्षेत्रमा पार्किङ निषेध गरेको थियो । महानगरको यस निर्णयको दरबारमार्गका व्यापारीहरूले विरोध जनाउँदै आएका छन् ।

उनीहरूले यसअघि सडकको एक छेउमा मात्रै पार्किङ राखेको भएपनि महानगरले पार्किङ हटाउँदा ५० देखि ६० प्रतिशत व्यापार घटेको बताउने गरेका छन् । व्यापारीहरुले बाध्य भएर पार्किङ निषेध गर्ने महानगरको कदमको विरोध गर्नुपरेको बताएका छन् । 

दरबारमार्गमा विकास बोर्डको अगुवाइमा भएको विरोध प्रदर्शनमा सहभागीहरूले ‘दरबारमार्गको पार्किङ हटाएकोमा हाम्रो घोर विरोध छ’ लेखिएको ब्यानर प्रदर्शन गरेका थिए ।

व्यवसायीहरूले धेरै पटक महानगरसँग वार्ता गर्ने भने तापनि महानगरले बेवास्ता गरेको भन्दै आन्दोलनमा उत्रेका हुन् । महानगरले यो पटक पनि वार्ता नगरे यो आन्दोलनले उग्ररूप लिने व्यवसायीहरूले चेतावनी दिएका छन् ।