काठमाडौँ :कर्णाली प्रदेश प्रहरी कार्यालय सुर्खेतका प्रहरी प्रमुख, प्रहरी नायब महानिरीक्षक भीमप्रसाद ढकालले ‘सुरक्षित कर्णाली प्रदेश विशेष अभियान’ सञ्चालन गरिने बताए ।

सुर्खेतस्थित पत्रकार सञ्चारकर्मीहरूसँग आज वीरेन्द्रनगरमा आयोजित भेटघाटमा उहाँले अभियानमार्फत प्रतिफल प्राप्त हुने गरी काम गर्ने जनाए ।

उनले भने, “यो अभियानभित्र प्रहरीको प्रभावकारी सेवा, नागरिकलाई अनुभूति दिलाउने गरी दिइने सुरक्षा, प्रविधिको प्रयोग, लागुऔषध न्यूनीकरण, सामाजिक सञ्जालको प्रयोगको निगरानी र सचेतनामूलकलगायतका गतिविधि पर्छन् ।”

प्रहरी नायब महानिरीक्षक ढकालले कर्णालीमा देखिएको सबैभन्दा ठूलो समस्या लागुऔषध नियन्त्रण तथा न्यूनीकरणमा विशेष जोड दिने र त्यसका लागि लागुऔषध उत्पादन हुने मूल थलोमै हान्ने बताए। त्यसपछि त्यसको कारोवार तथा ओसारपसार र प्रयोग गर्नेलाई कानूनी दायरामा ल्याउने उनको भनाइ थियो ।

कर्णाली प्रदेशको शान्ति र सुरक्षाका लागि यहाँ नागरिकसँग सहकार्य गरेर जाने बताउँदै उनले सुरक्षित प्रदेश निर्माणमा प्रेस जगत्, नागरिक समाज, अधिकारवादीलगायत सबै सरोकारवालाहरूको गहन भूमिका रहेको जनाए । उनका अनुसार गृहमन्त्रालयको निर्देशनबमोजिम नागरिकको सेवामा सहजीकरण गरिनेछ ।