काठमाडौँ – पश्चिमी न्यून चापीय प्रणालीको आंशिक प्रभाव र अरब सागरबाट आएको जलवाष्पयुक्त वायुको प्रभावले आज देशको पहाडी भेगमा आंशिक बदली भएको छ।

मौसम पूर्वानुमान महाशाखाकाअनुसार आज दिउँसो प्रदेश १, मधेश प्रदेश, बागमती प्रदेश र गण्डकी प्रदेशमा आंशिक बदलीको सम्भावना रहेको छ। प्रदेश १ मा भने राति पनि आंशिक बदली हुनेछ। भोलि शनिबार दिउँसो प्रदेश १ मा आंशिक बदली हुँदा राति प्रदेश १ , गण्डकी प्रदेश र सुदूरपश्चिम प्रदेशमा आंशिक बदली हुनेछ।

पर्सि आइतबार दिउँसो सुदूरपश्चिमको उच्च पहाडी तथा हिमाली भेगमा आंशिक बदली रहनेछ। राति सुदूरपश्चिम र कर्णाली प्रदेशमा आंशिकदेखि सामान्य बदली रही एक-दुई स्थानमा हल्का हिमपातको सम्भावना रहेको छ।

देशका अधिकांश स्थानमा साँझ बिहान हुस्सु र कुहिरो लागेर दैनिक जनजीवन, स्वास्थ्य, सडक तथा हवाई यातायातमा समेत सामान्य प्रभाव पर्न सक्ने भएकाले आवश्यक सावधानी अपनाउन महाशाखाले अनुरोध गरेको छ ।