काठमाडौं – भारतले पहिलो टेस्ट खेलमा घरेलु टोली दक्षिण अफ्रिकासँग खराब प्रर्दशन गरेको छ । दक्षिण अफ्रिकाको सेन्चुरियनमा टस हारेर पहिला ब्याटिङको निम्तो पाएको भारत पहिलो दिन ५९ ओभरमा ८ विकेट गुमाउँदै २ सय ८ रन मात्र बनायो ।

वर्षाको कारण पहिलो दिन दोस्रो सेसन भने हुन सकेन । भारतका लोकेश राहुल १ सय ५ बलमा १० चौका र २ छक्कासहित ७० रनमा नट आउट छन् । उनलाई मोहम्मद शिराजले साथ दिनेछन् । भारतका विराट कोहली ६४ बलमा ५ चौकासहित ३८ र श्रेयस ऐर ३१ रनमा आउट भए ।

दक्षिण अफ्रिकाका दुई तीव्र गतिका बलर कागिसो रबाडा र नान्द्रे बर्गरले भारतको शीर्ष र मध्यक्रम ब्याटिङ ध्वस्त पारे । ओपनर यशस्वी जैसवाल १७, कप्तान रोहित शर्मा ५, शुभमन गिल २ र शार्दुल ठाकुर २४ रनमा आउट भए ।

कागिसो रबाडाले १७ ओभरमा ४४ रन खर्चेर ५ विकेट लिएका छन । बर्गरले दुई र मार्को यानसनले एक विकेट लिएका छन् । भारत र दक्षिण अफ्रिकाबीच दुई टेस्ट खेलको सिरिज हुनेछ । दोस्रो टेस्ट ३ जनवरी देखी सुरु हुनेछ ।