इस्लामावाद- पाकिस्तानका किसानले युरिया मलको चरम अभाव भएको भन्दै आक्रोश पोखेका छन् । पाकिस्ताको पञ्जाब प्रान्तस्थित भावलनगरका स्थानीय किसानहरुले युरिया मलको कृत्रिम अभाव भएको र सरकारले पनि आफूहरुको समस्या समाधान गर्न ध्यान नदिएको आरोप लगाएका हुन् ।

पाकिस्तानबाट प्रकाशित हुने डन अखबारका अनुसार कृषि अधिकारी र व्यापारीको मिलेमतोमा युरिया मलको अभाव सिर्जना भएको किसानहरुको आरोप छ । किसानहरुका अनुसार औपचारिक बजारमा मल नपाइएपनि कालोबजारमा भने ५ हजार पाकिस्तानी रुपैयाँ प्रतिबोरा मल पाइन्छ, जुन १५ सय रुपैयाँ महङ्गो हो ।

भावलनगर किसान बोर्डका अध्यक्ष मियाँ नजीर चाकोकाले डनलाई बताएअनुसार मलको कृत्रिम अभावले पूरै जिल्ला प्रभावित भएको छ । उनले स्थानीय प्रशासनले मलको अभावलाई राजनीतिक हतियारका रुपमा प्रयोग गरेको पनि आरोप लगाए ।

उनले निश्चित नेताको सिफारिसमा मात्रै प्रशासनले मल दिने गरेको र मल लिन पनि प्रशासनलाई घुस दिनुपर्ने बाध्यता रहेको बताए ।