दोहा– संखुवासभा समाज र लालीगुराँस रेस्टुरेन्ट कतारले संयुक्त रुपमा आयोजना गरेको हरितालिका तीज तथा सचेतनामूलक कार्यक्रम गरेको छ ।

शुक्रबार कतारको सानैया प्लाजा महलको लालीगुराँस रेस्टुरेन्टमा आयोजित कार्यक्रममा दीपशिखा दाहाल, रेश्मा प्याकुरे, गंगा बजगाई, बिरेन मादेन, सृष्टि लामा, लगायत अन्य धेरै कलाकारहरूले प्रस्तुति दिएका थिए ।

कार्यक्रममा विभिन्न तीजका गीतमा नेपाली दिदी बहिनीहरूले सामूहिक नृत्य गरेका थिए । कार्यक्रमको अन्तिम चरणमा संस्कृतिको संयोजक बिरेन मादेनले ‘संखुवासभा राम्रो त्यहि पर्‍याे घर हाम्रो’ गीत गएर थप मनोरञ्जन प्रदान गरेका थिए ।

संखुवासभा समाज कतारका महासचिव पदम सिम्खडाले सञ्चालन गरेको कार्यक्रम समाजका अध्यक्ष राजेन्द्र खनालको अध्यक्षतामा भएको कार्यक्रम नेपाली महिला समाज कतारकी अध्यक्ष सरिता भण्डारी पौडेलको प्रमुख आथित्यतामा सम्पन्न भएको थियो ।

कार्यक्रम भव्य र सभ्य रुपमा सम्पन्न भएको भन्दै अध्यक्ष खनालले आगामी दिनहरूमा पनि यस्ता खालको कार्यक्रम गर्दै जाने बताए । समाजले भावी कार्ययोजना बनाएर अघि बढ्ने र विश्वको २७ देशहरूमा संखुवासभा समाजको  स्थापना भएपनि सक्रिय रुपमा रहेको समाज कतारकै भएको उनले बताए ।

संखुवासभाको पहिचान विश्व सामु चिनाउने हाम्रो अभियान भन्ने मूल नाराका साथ २०१६ मा स्थापना भएको समाजले संखुवासभा जिल्लामा विभिन्न आपत विपत्‌मा परेका जिल्लावासीलाई पनि समयसमयमा सहयोग गर्दै आएको छ ।

समाजले गत असार २ गते संखुवासभा चैनपुर नगरपालिकास्थित हेवाखोलामा आएको बाढीका कारण बेपत्ता भएका ५ जनाको परिवारलाई प्रति परिवार ४३ हजार रुपैयाँका दरले २ लाख १५ हजार रुपैयाँ आर्थिक सहयोग गरेको थियो ।