काठमाडौँ –  चीन भ्रमणमा गएको नेकपा माओवादी केन्द्रका उपाध्यक्ष एवं पूर्वसभामुख अग्निप्रसाद सापकोटा नेतृत्वको टोलीले चिनिया कम्युनिष्ट पार्टी (सीसीपी)का विदेश विभाग प्रमुख लिउ च्यान छाओबीच भेटवार्ता गरेको छ।

सापकोटा नेतृत्वको माओवादी प्रतिनिधि मण्डलले बिहीबार सीसीपीका विदेश विभाग प्रमुख लिउ नेतृत्वको टोलीसँग बेइजिङमा भेटवार्ता गरेको हो।

एक्लाएक्लै र सामूहिक गरी दुई चरणमा भएको भेटमा दुई देश र दुई पार्टीको सम्बन्धका विषयमा छलफल भएको जनाइएको छ। त्यसक्रममा चिनियाँ विदेश विभाग प्रमुख लिउले प्रचण्ड नेतृत्वको वर्तमान सरकारले लिएको आर्थिक विकास र समृद्धिको लक्ष्यमा चीनले निरन्तर सहयोग गर्ने प्रतिवद्धता जनाएका छन्।

उपाध्यक्ष सापकोटाले चीन नेपालको छिमेकी मात्र नभएर विकास साझेदार समेत भएको चर्चा गरे। ल्हासा र मानसरोबरको भ्रमण गरेर राजधानी बेइजिङ पुगेको सापकोटा नेतृत्वको टोली अहिले राजनीतिक भेटघाटमा व्यस्त छ।

यही जेठ ५ गते चीन प्रस्थान गरेको सापकोटा नेतृत्वको २० सदस्यीय टोली १८ जेठमा स्वदेश फर्कने कार्यक्रम छ।