काठमाडौँ- नेपाली कांग्रेसका महामन्त्री गगन थापाले उपनिर्वाचनमा विजयी भएका उम्मेदवारलाई बधाई दिएका छन् । सामाजिक सञ्जालमा स्टाटस लेख्दै महामन्त्री थापाले बारा २, चितवन २ र तनहुँ १ मा भएको उपनिर्वाचनमा विजयी भएका क्रमशः उपेन्द्र यादव, रवि लामिछाने र डा. स्वर्णिम वाग्लेलाई बधाई दिएका हुन् ।

फेसबुकमा उनले सम्मुनती र सुशासनका लागि संसदको यो कार्यकाललाई उपलब्धिमूलक बनाउन सहकार्य हुने अपेक्षा गरेका छन् । उपनिर्वाचनको परिणामले विशेष गरी नेपाली कांग्रेसलाई दिएको सन्देश के हो र यो सन्देशलाई पार्टीले कसरी लिनुपर्छ भन्ने लगायतका सन्दर्भमा सार्वजनिक बहस र विश्लेषण भइरहेको उनको भनाइ छ ।

पार्टीभित्र र पार्टी बाहिर देश विदेशमा रहेका शुभेच्छुक, समर्थक तथा आम मतदाता समेत विभिन्न माध्यमबाट बहसमा सहभागी भएको भन्दै उनले राजनीतिप्रतिको चासो र चिन्ताले नेपालको राजनीतिको शुद्धीकरण र नेपाली कांग्रेसलाई रूपान्तरण गर्ने अभियानलाई थप मद्दत पुग्ने उनको भनाइ छ ।

अहिले नेपाली कांग्रेसको सबै तहमा आबद्ध नेता तथा सदस्यले मतादेश र जनताको सन्देशलाई सम्मान र शिरोपर जानुपर्ने उनको भनाइ छ । उनले आफ्नो पार्टीको सन्दर्भमा समाजका विभिन्न क्षेत्रबाट आएका सुझाव, विचार र विश्लेषणलाई आत्मसात गरेर इमान्दार आत्मसमीक्षा गर्ने बताएका छन् । पार्टीमा रहेको समस्यालाई पन्छाएर वा लुकाएर नवजीवन सम्भव नरहेको भन्दै उनले सौम्यता र धैर्यतापूर्वक सबैको कुरा सुनेर मनन गरी आफैँतिर फर्केर निर्मम समीक्षा गर्दै वैचारिक र सांगठनिक दृष्टिले रूपान्तरण गरी हाम्रो पार्टीलाई जन भावनाअनुसार नयाँ जीवन दिनेगरी लाग्न आह्वान गरेका छन् ।

विगत लामो समयदेखि पार्टी रूपान्तरण, सुदृढीकरण तथा शुद्धीकरणको लागि आफूले पार्टीभित्र निरन्तर इमान्दार प्रयत्न गर्दै आएको उल्लेख गर्दै महामन्त्री थापाले पार्टी गतिशील र जनमुखी भइदियोस् भन्ने आमचाहना अनुरुप अपेक्षित परिणाम आइ नसकेको स्वीकार गरेका छन् ।