इटहरी – १३औं संस्करणको इटहरी गोल्डकपको उपाधि सगरमाथा युथ क्लब विराटचोकले जितेको छ।

चर्च व्बाइज क्लब काठमाडौँलाई सडनडेथमा ६५ ले हराउँदै सगरमाथाले उपाधिसँगै नगद १० लाख रुपैयाँ प्राप्त गरेको छ। उपविजेता चर्चले ५ लाख रुपैया प्राप्त गर्‍यो। यसअघि १२औँ संस्करणमा त्रिभुवन आर्मीलाई हराउँदै सगरमाथाले नै उपाधि जितेको थियो ।

व्यक्तिगत विधातर्फ सगरमाथाको वर्चस्व रह्यो। प्रतियोगिताको उत्कृष्ट गोलरक्षक सगरमाथाका देव लिम्बु, उत्कृष्ट डिफेन्डर विशाल बस्नेत, उत्कृष्ट फरवार्ड स्टेफेन र उत्कृष्ट प्रशिक्षक याम गुरुङ घोषित भए।उनीहरूले जनही २० हजार रुपैयाँ प्राप्त गरे।

उत्कृष्ट मिडफिल्डर चर्चका मौसम लिम्बु र उदीयमान खेलाडी राष्ट्रिय जागृतिका असीम राई घोषित भए। मौसमले २० हजार र असीमले ३२ इन्चको टेलिभिजन पाए। खेलका म्यान अफ दि म्याच चर्चका मौसम लिम्बु घोषित हुँदै नगद १० हजार प्राप्त गरे।

सर्वाधिक गोलकर्ता मच्छिन्द्रका कप्तान अफिज ओलावाले घोषित भए। ५ गोल गरेका उनले नगद ३० हजार प्राप्त गरे। सर्वोत्कृष्ट खेलाडी सगरमाथाका कप्तान महेन्द्र कार्की घोषित हुँदै नगद १ लाख रुपैयाँ प्राप्त गरे।

राष्ट्रिय जागृति क्लबको आयोजनामा इटहरी रंगशालामा गत चैत्र ४ गतेबाट सञ्चालन भएको प्रतियोगितामा नेपाल, भारत र क्यामरुनका ८ टोली सहभागी थिए।