काठमाडौँ– आईसीसी एकदिवसीय विश्वकप क्रिकेटमा अस्ट्रेलियाले सानदार जित निकालेको छ । भारतको दिल्लीस्थित अरुण जेट्ली क्रिकेट मैदानमा आज भएको खेलमा नेदरल्यान्ड्सलाई ३ सय ९ रनको फराकिलो अन्तरले हराउँदै अष्ट्रेलियाले सानदार जित निकालेको हो ।

अस्ट्रेलियाले जितका लागि दिएको ४ सय रनको विशाल लक्ष्य पछ्याएको नेदरल्यान्ड्स २१ ओभरमा अलआउट हुँदै ९० रनमा समेटियो । नेदरल्यान्ड्सका विक्रमजित सिंहले सर्वाधिक २५ जोडे । यस्तै, तेजा निदामानुरुले १४, कप्तान स्टक एड्वार्डस र कोलिन एकरम्यानले १२–१२ तथा साइब्रान्ड एन्गलब्रेचले ११ रन बनाए ।

अस्ट्रेलियाका एडम जाम्पाले सर्वाधिक चार विकेट लिए । यस्तै, मिचेल मार्शले दुई तथा जोश हेजलउड, मिचेल स्टार्च र प्याट कमिन्सले एक–एक विकेट लिए ।

त्यसअघि टस जितेर पहिले ब्याटिङ गरेको अस्ट्रेलियाले निर्धारित ५० ओभरमा आठ विकेटको क्षतिमा ३ सय ९९ रन बनाएको थियो । अस्ट्रेलियाका ग्ले म्याम्सवेलले सर्वाधिक १ सय ६ रनको शतकीय इनिङ खेले । यस्तै, डेविड वार्नरले १ सय ४, स्टिभ स्मिथले ७१, मार्नुस लाबुसेनले ६२, जोश इङ्लिसले १४ र प्याट कमिन्सले १२ रनको योगदान दिए ।

नेदरल्यान्ड्सका लोगन भा बिकले चार, बास डि लिडेले दुई तथा आर्यन दत्तले एक विकेट लिए ।

योसँगै लगातार तेस्रो जित निकालेको अस्ट्रेलिया पाँच खेलबाट ६ अंकका साथ चौथो स्थानमा छ । दुई अंक भएको नेदरल्यान्ड्स पुछारमा छ ।