काठमाडौँ- पोल्याण्ड पठाइदिने प्रलोभन देखाएर ठगी गरेको आरोपमा एक जना मेनपावर सञ्चालक पक्राउ परेका छन् । पक्राउ पर्नेमा राप्ती प्यालेसमेन्ट मेनपावरका सञ्चालक चितवन जिल्लाको भरतपुर घर भई हाल काठमाडौँको बसुन्धरा बस्ने ४२ वर्षीय रविन्द्र अधिकारी रहेको प्रहरीले जनाएको छ ।

काठमाण्डौं उपत्यका अपराध अनुसन्धान कार्यालयबाट खटिएको प्रहरी टोलीले अधिकारीलाई खोजतलास गर्ने क्रममा सोमबार बसुन्धाराबाट पक्राउ गरेको हो ।

अधिकारीले प्रेम तामाङसमेत ४ जनालाई वैदेशिक रोजगारीको लागि पोल्याण्ड पठाइदिन्छु, प्रतिव्यक्ति १२ लाख रुपैयाँ लाग्छ, त्यहाँ फुड प्याकिङमा काम गरेबापत १ लाख रुपैयाँ मासिक तलब हुन्छ भनी पीडितहरुबाट पटक पटक गरी २७ लाख २५ हजार रुपैयाँ ठगी गरेको प्रहरीले जनाएको छ ।

उनलाई थप अनुसन्धान तथा कारवाहीको लागि वैदेशिक रोजगार विभाग ताहाचल पठाइएको प्रहरीले जनाएको छ ।