कोची- भारतको केराला राज्यको कोची सहरमा १५ वर्षमा पहिलो पटक यहूदी परम्पराअनुसार विवाह समारोह सम्पन्न भएको छ । कोची सहरमा रहेको कुम्बलम रिसोर्टमा रेचल बिनोए मलाखी र रिचर्ड जक्यारी रोवेबीच यहूदी परम्पराअनुसार विवाह समारोह सम्पन्न भएको हो ।

इजरायली यहूदी धर्मगुरु रब्बाई आरेयल सियोनले यस विवाह समारोह सम्पन्न गराएको द न्युज मिनेटले जनाएको छ । यस अवसरका लागि रब्बाई इजरायलबाट भारत पुगेका थिए ।

केरलाको थिरुवनन्तपुरमकी रेचल हाल अमेरिकामा वैज्ञानिकको रुपमा कार्यरत रहेको जनाइएको छ । त्यसैगरी, रिचर्ड अमेरिकी मूलका यहूदी रहेको र उनी नासामा इन्जिनियरको रुपमा कार्यरत रहेको जनाइएको छ ।

यहूदी परम्पराअनुसार विवाह समारोह सम्पन्न हुनका लागि १० जना वयष्क यहूदी पुरुषको उपस्थिती अनिवार्य मानिन्छ । विवाह समारोहमा दुबै परिवारका नजिकका आफन्तको उपस्थिती रहेको थियो ।

कोचीमा अझै पनि २५ जना यहूदी धर्मावलम्बीको बसोबास रहेको छ । यसअघि सन् २००८ मा उक्त सहरमा यहूदी परम्परा अनुसार विवाह समारोह सम्पन्न भएको थियो ।