काठमाडौं– प्रतिनिधिसभा सदस्य किरण कुमार साहले संसदको बुधबारको बैठकमा मुलुकमा भइरहेको धर्मान्तरणप्रति चिन्ता व्यक्त गरेका छन् । बुधबार बैठकमा सम्बोधन गर्दै साहले मुलुकमा बढ्दो धर्मान्तरणप्रति चिन्ता व्यक्त गरेका हुन् ।
सम्बोधनका क्रममा उनले कसैले जनयुद्ध जिन्दावाद भन्ने गरेको, कसैले, जय नेपाल भन्ने गरेको त कसैले लाल सलाम भन्ने गरेको उल्लेख गर्दै आफू भने सनातन हिन्दू राष्ट्रको पक्षमा रहेको बताए । उनले भने, ‘कोही जनयुद्ध जिन्दावाद भन्नुहुन्छ, कोही जय नेपाल भन्नुहुन्छ, कोही लालसलाम भन्नुहुन्छ, कोही कमरेड भन्नुहुन्छ, तर म यही रोस्ट्रमबाट सनातन हिन्दू राष्ट्र नेपाल जिन्दावाद भन्न चाहन्छु ।’
सरकारले आफ्नो नीति तथा कार्यक्रममा बुँदा नम्बर ७ मा संविधान कार्यान्वयन उत्साहजनक रहेको उल्लेख गरेपनि त्यसमा सत्यता नभएको उनको दाबी छ ।
उनले प्रश्न गरे, ‘‘म सरकरलाई संविधानको धारा ४ स्मरण गराउन चाहन्छु । जहाँ लेखिएको छ, ‘धर्म निरपेक्षता भन्नाले सनातनदेखि चलिआएको धर्म संस्कृतिलाई संरक्षण साथै धर्म र संस्कृतिको स्वतन्त्रता सम्झिनुपर्छ ।’ तर, के हामी भयरहित वातवरणमा सनातन धर्म संस्कृति मनाउन सकिरहेका छौं ?’
पछिल्लो समय भयरहित वातावरणमा सनातन धर्म मान्नेहरुले आफ्नो पर्व मनाउनसमेत त्रसित हुनुपर्ने स्थिति सिर्जना भएको भन्दै उनले रौतहट, कपिलवस्तु, धनुषा, महोत्तरीलगायतका जिल्लामा हिन्दू धर्मावलम्बीको चाडपर्वमा अतिवादीबाट आक्रमण भइरहेको टिप्पणी गरे ।
सनातन भन्नाले हिन्दू धर्म मात्र भन्ने अर्थ नलगाइयोस् भन्दै उनले यसमा हिन्दूसँगै, बौद्ध, किराँतलगायतका अन्य धर्म मान्नेहरुमा पनि धर्मान्तरणको चपेटामा परेको बताए । उनले भने ‘यसरी राष्ट्रिय संस्कृति र सभ्यता नै खतरामा परेको बेला के यो विषय सरकारको नीति तथा कार्यक्रमको प्राथमिकतामा पर्नु हुँदैन ? त्यसैले यो रोस्टममा मैले सनातन हिन्दू राष्ट्र जिन्दावादको नारा लगाएको हो ।’
रौतहट २ बाट निर्वाचित सांसद साहले पहिलो पटक संसदमा सम्बोधनको अवसर पाएका हुन् ।
प्रतिक्रिया