काठमाडौँ- मोहम्मद शाहबुद्दीन बंगलादेशको २२ औं राष्ट्रपति निर्वाचित भएका छन् । उनले प्रधानमन्त्री शेख हसिना, राजनीतिज्ञ, न्यायाधीश र अन्य वरिष्ठ अधिकारीहरूको उपस्थितिमा आयोजित एक समारोहबीच सोमबार राष्ट्रपतिको सपथ लिएका हुन् ।

समारोहमा सभामुख शिरीन शर्मिन चौधरीले शाहबुद्दीनलाई सपथ गराएकी हुन् । उनी गत फेब्रुअरीमा सत्तारुढ दलका तर्फबाट निर्विरोध निर्वाचित भएका थिए ।

उत्तरपश्चिमी बंगलादेशको पबना जिल्लामा १९४९ मा जन्मेका मोहम्मद शाहबुद्दीनले आफ्नो सुरुवाती जीवनकालमा जिल्ला न्यायाधीशको जिम्मेवारी सम्हालेका थिए । पछि उनी भ्रष्टाचार निवारण आयोगको आयुक्तको रूपमा नियुक्त भएका थिए ।

त्यसपछि राजनीतिमा लागेका उनले अवामी लिग पार्टीको सल्लाहकार परिषद्को सदस्यको रुपमा काम गरेका थिए । यद्यपि राष्ट्रपतिको पद सम्हाल्नका लागि उनले आफ्नो पार्टीको पदबाट राजीनामा दिनुपरेको थियो ।