काठमाडौँ- पाकिस्तानका विदेशमन्त्री बिलावल भुट्टो जर्दारी भारतको भ्रमण गर्ने भएका छन् । साङ्घाई सहयोग संगठनको बैठकमा सहभागी हुन पाकिस्तानी विदेशमन्त्रीले भारत भ्रमण गर्ने भएका हुन् । भुट्टो आगामी मे ४ र ५ मा हुने बैठकमा सहभागी हुने पाकिस्तानी सञ्चारमाध्यमले जनाएका छन् ।

बैठकमा संगठनका सदस्य राष्ट्रहरु चीन, रुस, कजाकस्तान, उज्बेकिस्तान, किर्गिस्तानजस्ता मुलुकका प्रतिनिधिको पनि सहभागिता रहने बताइएको छ । भारतमा आयोजना हुने बैठकमा सहभागि हुनेबारे यसअघि पाकिस्तानले आनाकानी गर्दै आएको थियो ।

सन् २०१४ मा तत्कालीन प्रधानमन्त्री नवाज शरीफले भारतको भ्रमण गरेयता कुनै पनि सत्तारुढ पाकिस्तानी नेताले भारतको भ्रमण गरेका छैनन् । ९ वर्षपछि हुन लागेको पाकिस्तानी नेताको भारत भ्रमणलाई निकै चासोका साथ हेरिएको छ ।