काठमाडौँ– भारत र चीनले द्विपक्षीय सम्बन्धलाई सुधार गर्न तयार रहेको जनाएका छन् । चीनको सिन्ह्वा समाचार संस्थाले दुई मुलुकहरु द्विपक्षीय सम्बन्धलाई सुधार गर्न तयार रहेको जनाएको हो ।

हालै दुई मुलुकका विदेशमन्त्रीहरुबीच जी २० को शिखर सम्मेलनमा भेटवार्ता भएको थियो । उक्त भेटवार्तामा भारतीय विदेशमन्त्री एस जयशंकर र चिनियाँ विदेशमन्त्री चिन गाङबीच भविष्यमा हुने सहकार्य, जनस्तरको सम्बन्ध र सीमा क्षेत्रमा कायम अवस्थालाई सुधार गर्ने विषयमा छलफल भएको बताइएको छ ।

दुई मुलुकबीच मतभेदभन्दा साझा हित र चासो धेरै रहेको उल्लेख गर्दै चिनियाँ विदेशमन्त्री चिनले सीमामा कायम तनावपूर्ण अवस्थालाई सुधार गर्नुपर्ने बताएका छन् ।

त्यसैगरी भारतीय विदेशमन्त्री जयशंकरले चीनसँगको द्विपक्षीय सम्बन्धलाई ऐतिहासिक एवम् रणनीतिक दृष्टिकोणबाट हेरिनुपर्ने उल्लेख गर्दै सीमामा जारी तनाव विस्तारै सुधार हुँदै गएको बताएका थिए ।

पछिल्ला केही वर्षयता सीमामा जारी तनाव र कूटनीतिक मतभेदका कारण सम्बन्धमा चिसोपन बढ्दै गएको बेला दुई मुलुक सम्बन्धलाई सुधार गर्न तयार भएका हुन् ।