तुलसीपुर– लुम्बिनी प्रदेश सरकारको लगानीमा दाङको दङ्गीशरण गाउँपालिका–७ स्थित सिमठाना र सिमठानी गाउँमा खानेपानीको काम अघि बढेको छ । खानेपानीको समस्या भोग्दै आएका यहाँका करिब तीन सय घरधुरीका लागि जिल्ला खानेपानी तथा सरसफाइ डिभिजन कार्यालयमार्फत खानेपानी विस्तारको काम अघि बढेको हो ।

यसअघि कुवाको पानीको भरमा यहाँका बासिन्दाको दैनिकी चलिरहेकोमा कुवा पनि सुकेपछि थप समस्या भएको थियो । कुवा सुकेपछि जरुवाको अशुद्ध पानीको भरमा दैनिकी चलाएका यहाँका स्थानीय शुद्ध पानी पाउने भएपछि खुसी भएका छन् ।

कार्यालयका इञ्जिनियर वसन्तकुमार दुलालका अनुसार खानेपानीका लागि बोरिङ तयार भइसकेको छ । ‘एकसय २२ मिटर गहिरो खनेर बोरिङ तयार पारेका छौँ’, उनले भने, ‘अहिले तयार पारिएको बोरिङबाट २० लिटरप्रति सेकेन्ड पानी फालिरहेको छ ।’ योसँगै अब ओभरहेड ट्याङ्की निर्माणको कामलाई अगाडि बढाउन थालिएको उनको भनाइ थियो ।

ओभरहेड ट्याङ्की निर्माण भएमा यहाँका प्रत्येक घरमा खानेपानी पुर्‍याउन सकिने दुलाले बताए। उनका अनुसार चालु आर्थिक वर्षमा लुम्बिनी प्रदेश सरकारले रू ५० लाख बजेट विनियोजन गरेको छ । उक्त बजेटले अहिले काम भइरहेको उनको भनाइ थियो । 

थप बजेट आवश्यक परेमा व्यवस्थापन गरेर घरघरमा खानेपानी पुर्‍याइने प्रदेशका अर्थमन्त्री धनबहादुर मास्कीले बताए । ‘एक घर, एक धारा’ भन्ने प्रदेश सरकारको नारा नै भएकाले आफूहरुले खानेपानी नपुगेको ठाउँमा खानेपानी पुर्‍याउने गरी काम अघि बढाइरहेको उनको भनाइ थियो । ‘खानेपानी पुर्‍याउने सरकारको दायित्व हो’, मन्त्री मास्कीले भने, ‘सिमठाना र सीमठानी गाउँमा छिट्टै खानेपानी पुर्‍याउने गरी काम भइरहेको छ ।’

विद्युत् र पम्प हाउस जडान गरेमा छिट्टै यहाँका बासिन्दाले खानेपानी पाउने गाउँपालिकाका अध्यक्ष शम्भु गिरीले बताए। पहिलो चरणमा घरघरमा खानेपानी पुर्‍याउने उद्देश्यले खानेपानीका लागि आवश्यक संरचना निर्माण अघि बढाइएको उनले बताए।