एजेन्सी – मध्य सोमालियाको बेलेडवेन शहरको एक सुरक्षा जाँच केन्द्रमा शनिबार भएको आत्मघाती कार बम आक्रमणमा परी कम्तीमा २० जनाको मृत्यु भएको स्थानीय अधिकारीले बताएका छन् ।

बेलेडवेनका जिल्ला आयुक्त ओमार अलासोले बजारको चोक र दुई पेट्रोल पम्प नजिकै विस्फोट हुँदा ठूलो क्षति भएको बताए । उनले आत्मघाती बम आक्रमणका पीडितहरूको सहयोगका लागि सुरक्षा बल र स्वास्थ्य टोलीहरू मैदानमा रहेको पनि बताए ।

उनले भने, “हामी अहिले पनि आतङ्कवादी हमलासँग सम्बन्धित विवरण सङ्कलन गरिरहेका छौं । हताहतको सङ्ख्या उल्लेख्य छ र हामी पीडितलाई स्थानीय अस्पतालमा पु¥याइरहेका छौं । यदि उनीहरूले गम्भीर घाइतेहरूको उपचार गर्न सकेनन् भने हामी उनीहरूलाई थप उपचारका लागि मोगादिशु लैजाने प्रयास गर्नेछौं ।”

अलसोले स्थानीय पत्रकारसँग भने, “यो निकै स्तब्ध पार्ने आतङ्कवादी हमला हो । घरहरू र व्यापारिक केन्द्रहरू ध्वस्त भएका छन् र ती घरहरू भित्रका बासिन्दाहरू अझै सम्पर्कमा आउन सकेका छैनन् भने केही शव फेला परेका छन् ।”

“विस्फोट भूकम्पजस्तै थियो,” घटनास्थलमा रहेका एक वृद्ध अब्दी हुसेनले भने । स्थानीय स्रोतले सञ्चारमाध्यमलाई दिएको जानकारीअनुसार घाइतेमध्ये कैयौँको अवस्था गम्भीर रहेकाले मृतकको सङ्ख्या ३० सम्म पुग्न सक्ने बताइएको छ ।

यस आक्रमणको कुनै पनि समूहले जिम्मेवारी लिएको छैन । सामान्यतया मोगादिसु र सोमालियाका अन्य ठाउँहरूमा अल–शबाब चरमपन्थी समूहले यस्ता आक्रमणहरू गर्ने गर्दछ ।