काठमाडौँ– आईसीसी यू–१९ विश्वकप २०२४ अन्तर्गत नेपालले पहिलो खेल आगामी जनवरी १३ मा न्युजिल्याण्डसँग खेल्ने भएको छ । 

अन्तर्राष्ट्रिय क्रिकेट परिषद (आईसीसी)ले जारी गरेको खेल तालिका अनुसार समूह ‘डी’ मा रहेको नेपालले समूह चरणमा न्युजिल्यान्ड, पाकिस्तान, र अफगानिस्तानसँग प्रतिस्पर्धा गर्नेछ । 

आईसीसीका अनुसार प्रतियोगिता आगामी जनवरी १३ देखि फेब्रुअरी ४ सम्म श्रीलंकाको कोलम्बोमा हुनेछ ।

नेपालले आठौं पटक यू–१९ विश्वकप खेल्न लागेको हो । नेपालले यू–१९ विश्वकपमा पहिलो पटक अफगानिस्तानसँग खेल्न लागेको छ ।

नेपालले सन् २००२ मा न्युजिल्यान्डमा भएको विश्वकपमा पाकिस्तानलाई पराजित गरी सनसनी मच्चाएको थियो । नेपालले २००६ र २०१६ मा गरी न्युजिल्यान्डलाई दुई पटक पराजित गरिसकेको छ ।

खेल तालिकाअनुसार समूह ‘ए’ मा भारत, बंगलादेश, आयरल्यान्ड र अमेरिका, समूह ‘बी’ मा इंग्ल्यान्ड, दक्षिण अफ्रिका, वेस्ट इन्डिज र स्कटल्यान्ड तथा समूह ‘सी’ मा अस्ट्रेलिया, श्रीलंका, जिम्बावे र नामिबिया छन् । 

नेपालले पाकिस्तानसँग जनवरी १७ र अफगानिस्तानसँग जनवरी २० मा खेल्ने छ ।