सिरहा– सिरहाको विष्णुपुर बजारमा रहेको एक कपडा पसलमा आगलागी हुँदा लाखौँ मूल्य बराबरको धनमाल जलेर नष्ट भएको छ।

विष्णुपुर गाउँपालिका–५ का चन्देश्वर महतोले विष्णुपुर– १ बजारमा सञ्चालन गर्दै आएको कपडा पसलमा आगलागी हुँदा ८० लाख रुपैयाँभन्दा बढीको धनमाल जलेर नष्ट भएको जनाइएको छ ।

आगलागीबाट पसलमा रहेका कपडालगायतका सामान पूर्ण रुपमा नष्ट भएको प्रहरीले जनाएको छ । प्रारम्भिक तथ्याङ्क अनुसार ८० लाखभन्दा बढीको धनमाल जलेको जिल्ला प्रहरी कार्यालय सिरहाका सूचना अधिकारी डीएसपी रविन्द्रराज पाण्डेले जानकारी दिए ।

विद्युत सर्ट भएर आगलागी भएको अनुमान गरिए पनि आगलागीको कारण अझै खुल्न नसकेको प्रहरीको भनाइ छ ।

सिरहा र गोलबजार नगरपालिकाबाट गएका बारुण यन्त्र, प्रहरी र स्थानीयको सहयोगमा आगो नियन्त्रणमा लिइएको थियो। घटनाको विषयमा थप अनुसन्धान भइरहेको प्रहरीले जनाएको छ।