काठमाडौँ- भ्रष्टाचार गरेको आरोपमा अख्तियार दुरुपयोग अनुसन्धान आयोगले मुद्दा दायर गरेपछि खोटाङका प्रमुख जिल्ला अधिकारी भोजराज खतिवडा निलम्बित भएका छन् । अख्तियारले आइतबार विशेष अदालतमा मुद्दा दायर गरेपछि खतिवडा निलम्बनमा परेका हुन् ।

जिल्ला ओखलढुङ्गा जिल्लाको सिद्धिचरण नगरपालिकाका तत्कालीन प्रमुख प्रशासकीय अधिकृत रहेका खतिवडाले भ्रष्टाचार गरेको आरोपमा अख्तियारले मुद्दा दायर गरेको हो ।

उनलाई विद्युत लाइन विस्तार परियोजनामा भ्रष्टाचार गरेको आरोप लागेको छ । यही परियोजनामा संलग्न अरु १० जनाविरुद्ध पनि भ्रष्टाचार मुद्दा दायर गरिएको अख्तियारले जनाएको छ ।

गृह मन्त्रालयले खतिवडालाई आइतबार नै निलम्बन गरिएको हो । खतिवडा निलम्बनमा परेपछि उनको स्थानमा अर्का प्रजिअ पठाइने भएको छ ।