काठमाडौँ – प्रतिनिधिसभाका सदस्य तारा लामा तामाङले नेपाल एयरलाइन्सको प्रमुख खुल्ला प्रतिस्पर्धाबाट नियुक्त गर्नुपर्ने धारणा राखेका छन् । प्रतिनिधिसभाको शुक्रबार बसेको बैठकमा बोल्दै सांसद तामाङले नेपाल एयरलाइन्सलाई सुधार गर्नको लागि योग्य व्यक्तिलाई नियुक्त गर्नुपर्ने धारणा राखेका हुन् ।

उनले नेपाल एयरलायन्स आर्थिक रुपमा नाजुक अवस्थामा पुगेको बेला पर्यटनमन्त्रीले ४०/५० जना कर्मचारी करारमा नियुक्त्ति गर्नु गलत भएको बताए । सांसद तामाङले पर्यटन मन्त्रालयले निजि क्षेत्रलाई प्रोत्साहन गर्ने कुनै योजना नल्याएको भन्दै विरोध समेत जनाए ।

यस्तै सुरक्षा निकायका कर्मचारीमा समेत सरकारले विभेद गरेको भन्दै सांसद तामाङले नेपाल प्रहरी र सशस्त्र प्रहरीमा सरकारले खानाको दररेटमा एकरुपता ल्याउन सुझाव दिए । सीमा क्षेत्रमा खटिएका सुरक्षाकर्मीहरुको अवस्था दयनिय भएको भन्दै उनले बीओपीलाई व्यवस्थित बनाउन सरकारको ध्यानआकर्षण गरेका छन् ।

साथै सांसद तामाङले नेपाली सेना देशको गौरव गर्न लायक संस्था भएको भन्दै उनले यसको संख्याको बारेमा विभिन्न टिका टिप्पणी हुने गरेकोले यस बारेमा राष्ट्रिय सहमति हुनुपर्ने धारणा राखे ।

तामाङले भने ‘अहिलेका प्रधानमन्त्री पुष्पकमल दाहाल प्रधानमन्त्री हुनुपुर्व सेनाको संख्या १० हजार भए हुन्छ किन यति ठुलो सेना चाहियो भन्ने अभिव्यक्ति दिनुहुन्थ्यो । त्यसैले उहाँ अहिले प्रधानमन्त्री हुंदा यो विषय उठेको हुनसक्छ । हैन भने यसको विषयमा गैरजिम्मेवार हिसावले बोल्नु हुंदैन । सेनाको संख्याबारे हामिले राष्ट्रिय सहमति गर्न आवश्यक भइसकेको छ ।’

उनले नेपाली सेनालाई समेत अहिलेको समयअनुकुल चल्न सुझाव दिए ।