रामेछाप – आफ्नो नगरको शैक्षिक क्षेत्रको सुधार गर्न मन्थली नगरपालिका लागि परेको छ । पछिल्लो समयमा सामुदायिक शिक्षा सुधारको अभियान नै सञ्चालन गरेर नगरपालिकाले सुधारको प्रयास गरेको छ । नगरपालिकाले शिक्षा क्षेत्रको विकासलाई पहिलो प्राथमिकतामा राखेर सामुदायिक विद्यालयको पठनपाठनलाई गुणस्तरीय बनाउने अभियानलाई तीव्र बनाएको हो ।

सोही अभियानअन्तर्गत नगरपालिकाले अहिले अभिभावक, शिक्षक, विद्यार्थी, सरोकारवाला निकायसँग वडा तहमा नै छलफल, प्रशिक्षणलगायतका कार्यक्रम सञ्चालन गरिरहेको छ । त्यसैगरी आन्तरिक व्यवस्थापन सुधार, शिक्षण सिकाइ उपलब्धिको लागि प्रधानाध्यापक तथा शिक्षकसँग पनि दोहोरो सवालजवाफ, दैनिक विद्यार्थी, शिक्षक डायरी व्यवस्थापन र दैनिक कामको अभिलेखीकरणलगायत विभिन्न काम नगरपालिकाले सुरु गरेको छ ।

यही अभियानअन्तर्गत आइतबार मन्थली नगरपालिका–२ कठजोरको निलकण्ठेश्वर माध्यमिक विद्यालयमा गुणस्तरीय शिक्षाको लागि शिक्षक तथा सरोकारवालाबीच अन्तरक्रिया गरेको थियो । विद्यालयका शिक्षक, विद्यालय व्यवस्थापन समिति, अभिवाक र स्थानीय सरोकारवालासँग नगरपालिका प्रमुख लव श्रेष्ठ, उपप्रमुख ईश्वरी बस्नेत, सामाजिक विकास समितिका संयोजक एवं वडा नं–८ का वडाध्यक्ष गोपाल श्रेष्ठ, वडा नं २ का वडाध्यक्ष सुरेन्द्र कार्की, वडा नं ३ का वडाध्यक्ष कृष्णगोपाल थापा, महाशाखा प्रमुख हेमन्त बुढाथोकी समेतको उपस्थितिमा शिक्षा सुधारका सवालमा छलफल गरिएको थियो ।

कार्यक्रमका अवसरमा नगरप्रमुख श्रेष्ठले सामुदायिक शिक्षाको गुणस्तर सुधार नगरपालिकाको पहिलो प्राथमिकतामा रहेको बताए । उनले भने, “मन्थली नगरपालिकाको पहिलो प्राथमिकता शिक्षा नै हो, त्यसैले बजेटको अभावले शिक्षामा सुधार गर्ने काम पैसाको अभावले रोकिँदैन ।” शैक्षिक सुधारका लागि आवश्यकता अनुसारको दीर्घकालीन तथा प्रभावकारी योजना बनाएर लाग्न विद्यालयलाई आग्रह गर्दै नगरप्रमुख श्रेष्ठले आवश्यक स्रोत र साधनको व्यवस्थापन नगरपालिकाले गर्ने बताए ।

कूल १४ वडा रहेको मन्थली नगरपालिकामा १९ माध्ययिक विद्यालय र ४९ आधारभूत विद्यालय सञ्चालनमा रहेका छन् । यी विद्यालयमा अध्ययनरत करिब १० हजार पाँच सयभन्दा बढी विद्यार्थीको शैक्षिक उन्नयनका लागि नगरले अभियान चलाएको र त्यसका लागि सरोकारवालाले पनि सक्रियता र चासो देखाएको नगर पालिकाले जनाएको छ ।