काठमाडौं– राष्ट्रिय जनमोर्चाले संस्कृति पर्यटन तथा नागरिक उड्डयन मन्त्री सुदन किरातीको अभिव्यक्ति संविधान विपरीत एवं बिखण्डनवादीलाई मद्दत  पुर्‍याउने खालको भएको बताएको छ । 

जनमोर्चा अध्यक्ष चित्रबहादुर केसीले एक विज्ञप्ति जारी गर्दै भनेका छन्, ‘क्रिश्चियन नमान्नेहरू संविधान नमान्नेहरू हुन्, तिनलाई जेल कोचौँ भनी मन्त्री सुदन किरातीले सार्वजनिक रुपमा दिएको अभिव्यक्तिको राष्ट्रिय जनमोर्चाले कडा शब्दमा निन्दा तथा भर्त्सना गर्दछ ।’ केसीले अगाडि भनेका छन्, ‘नेपाल एउटा बहुधर्म, बहुभाषा, बहुसंस्कृति भएको मुलुक हो । हाम्रो संविधानले धर्म निरपेक्षतालाई स्वीकार गरेको छ । कुनै धर्मको पक्ष लिएर अन्य धर्मप्रति विद्वैष फैलाउने कुरा सामाजिक सद्भाव बिथोल्ने कुरा हो ।’

मन्त्री जस्तो जिम्मेवार व्यक्तिले साम्प्रदायिक सद्भाव बिथोल्ने गरी अभिव्यक्ति दिएको बताउँदै केसीले भनेका छन्, ‘यो अभिव्यक्ति न संविधान सम्मत छ, न त मुलुकको सामाजिक सद्भावलाई अक्षुण्ण राख्ने खालको छ ।’

जिम्मेवार पदमा भएका व्यक्तिले यस प्रकारका अभिव्यक्ति दिएर विखण्डनको उद्देश्य पूरा गर्न चाहने शक्तिलाई बल नपुर्‍याउन केसीले सुझाव दिएका छन् ।