काठमाडौँ– साउदी प्रो लिग फुटबलमा अल हिलालले आफ्नो अग्रता कायमै राखेको छ । गए राति भएको खेलमा अभालाई ७–० गोल अन्तरले हराउँदै आफ्नो अग्रतालाई फराकिलो बनाएको हो ।

हिलालका सर्ज मिलिंकोभिक सेभिकले ह्याट्रिक गरेका थिए भने एलेजान्डर मिट्रोभिक, अल दाब्सरी, मोहम्मेद कान्नो र कप्तान रुवेन नेभसले एक–एक गोल गरेका थिए ।

यो जितसँगै १८ खेलबाट अपराजित यात्रालाई निरन्तरता दिएको अल हिलाल ५० अंकका साथ तालिकाको शीर्ष स्थानमा रहेको छ । अल हिलालले क्रिष्टियानो रोनाल्डो सम्मिलित अल नासरसँग १३ अंकको अग्रता बनाएको छ । दुई खेल कम खेलेको अल नासरको ३७ अंक छ ।

यस्तै, तेस्रो स्थानको अल अहलीले ३४ अंक जोडेको छ । अहलीले १७ खेल खेलेको छ । अल हिलालसँग पराजित भएको अभा १४ अंकसहित १६औँ स्थानमा छ ।